الصفحات

بحث

ادخلي ايميلك ليصلك كل جديد

الجمعة، 17 ديسمبر، 2010

زبادي بيتى على طريقتى


طريقتى لعمل الزبادي:

 عمل الزبادي سهل جدا و مش محتاج وقت خالص..في المعتاد كل اللى بتحتاجيه لعمل زبادي بيتي هوه علبه زبادي جاهزه و لبن دافئ لكن انا ليا اضافتين و ان شاء الله يعجبكم الطريقه.



لعمل الزبادي نحتاج :
لتر لبن دافئ ( مش بارد دفيه كويس ) - علبه زبادي جاهز 200 جرام
اللبن المفروض كامل الدسم لكن لو شيلتي القشطه فحتحتاجي تضيفي 
معلقتين كبار لبن بودره حيعوض الدسم اللي خرج في القشطه 
نقطتين عصير ليمون ..علشان بيساعد ان الزبادي يتماسك كويس


  • نضيف اللبن البودره للحليب و نقلب بالمضرب الشبك
  • نضيف الزبادي على الحليب و نقلب بالمضرب الشبك
  • اخر حاجه نضيف نقطتين او تلاته من عصير الليمون و مش كتير





نصب الزبادي في الاطباق
و ندفي الفرن و نطفيه و نحط الاطباق في الفرن 
في العادي ممكن تبيتيه في الفرن من بالليل لتاني يوم الصبح يعني في حدود 12 ساعه
و ممكن اقل لو الجو  حر




اليومين دول الجو برد جدا فا كان حيبوظ منى سيبته يمكن 18 ساعه و كل اللي حصل ان السطح هوه اللي تماسك و الفرن مش بيحافظ على الدفا اكتر من 5 دقائق
فا جربت طريقه و الحمد لله نفعت و كان الزبادي اتماسك في خلال ساعه
اللي عملته انى شغلت الفرن بس على اقل درجه يعني موطياه الدرجه اللي قبل ما تقفليه على طول و حطيت الزبادي و سيبت الباب مفتوح بتاع الفرن حاجه بسيطه مسافه 10 سنتيمتر
يعني الفرن شغال بس لو حطيتي ايدك على رف الشبك تحسيه سخن و مش بيلسعك تقدر ايدك تفضل عليه عادي
في خلال ساعه كنت لحقته الحمد لله :)


غطي علب للزبادي باغطيه منه حفاظ على الزبادي و منه توفير في المساحه جوه التلاجه 
نسيت اقولكم الزبادي ان شاء الله حيكون متماسك كويس اوي و ان شاء الله حيعجبكم
و احلى طريقه لتقديم الزبادي في نظري ان بتقطع عليه قراصيا و مشمش مجفف بيكون رائع و مفيد جدا جدا
                        و بالهنا و الشفا

2 التعليقات :

تسلم إيدِك لكن أنا لما بأعمله بزبادى عادى من السوبر ماركت ولبن مبستر مش بيمسك لازم لبن بلدى وزبادى بلدى ، إنتِ بتستخدمى اللبن إيه؟

بستخدم لبن بلدي بس ...هوه بيمسك من التخمير في جو دافي كويس يعني دفيله الفرن كويس و نقطتين الليمون حيساعدوكي

إرسال تعليق

Related Posts Plugin for WordPress, Blogger...