الصفحات

بحث

ادخلي ايميلك ليصلك كل جديد

السبت، 11 ديسمبر 2010

طريقه عمل خبز او عيش البكاكين


ده عيش معروف في الارياف اسمه بكاكين طعمه حلو جدا جدا انا خبزته انهارده في فرن بوتجازي و نقلت لكم الطريقه بالخطوات و الصور يا رب تفيدكم و تعملوه و يعجبكم و الصور كلها من مطبخي

المقادير : كيلو دقيق - تلات ارباع لتر لبن رايب للعجن ( ممكن العجن بالزبادي او اللبن بس الرايب هوه اللي بيدي احلي نتيجه )- كوب سمن- 2 معلقه كبيره خميره فوريه - نص معلقه سكر - رشه ملح
 
 الطريقه :نعجن المكونات مع بعضها للحصول على عجينه طريه زي اللي في الصوره و نتركها ترتاح نص ساعه 


نقسم العجين الى كور صغيره بحجم البيضه و نفردها بالنشابه و نضع كل رغيف على منديل ورق و نرصهم فوق بعض و نسيبهم يرتاحو نص ساعه كمان

نولع الفرن انا فرني الشوايه و الفرن بيشتغلو مع بعض لكن ممكن تعملو نص او تلات تربع مده الشغل على نار الفرن العاديه و اخر المده تولعو الشوايه
اهم خطوه اللي حتخلي العيش منفوش من النص انكم تمسكو العيش بالمنديل و تقلبوه على صينيه الخبز يعني القعر اللي على المنديل هوه اللي يكون بيبص لفوق في الفرن كمان ما تمسكوش العيش بايديكم كله بالمنديل الورق و تشيلو المنديل اول ما تحطوه على الصينيه في الفرن


تدخلوه الفرن و مش بياخد دقايق بيستوي بسرعه فا خليكم متابعينه ممكن 3 او اربع دقايق بالكتير

تخلصوه و تحطوه جوه قماشه و تقفلو عليه علشان يطري و بعدين تحطوه في الفريزر و تاخدو منه زي ما تحبو و بالهنا و الشفا و صدقونى ولادكم حيحبوه جدا و حتدعولي :)

17 التعليقات :

ان شاء الله اعمله لن شكله يتاكل حاف ههههههههه شكرا

ما شاء الله تحفة والله تسلم ايديكى

افكار جميلة وممتعة اوى
اشكرك اوى

تسلمو كلكم :) ان شاء الله تجربوه و تقولولي النتيجه

السلام عليكم
أول ما شفته حبيت أعمله .. و فعلا عملته إمبارح ... لكن للأسف ما نجحش معايا :( ... و مش بقول مقاديرك أو طريقتك غلط لا سمح الله ... لكن حاولت أتبع تعليماتك لكن ما نفش من النص خالص .. و اللي نفش معايا ... طبقة رقيقة جدا اللي نفشت و كانت شبه محمرة زيادة

إنتي كان سمكه أد ايه ؟؟ يعني فردتيه رفيع و لا سميك شوية ؟؟

و عليكم السلام يا حبيبتي :) ما تزعليش هيه ساعات بيحصل كده عادي
بصي سمكه بيكون في حدود 2 مللي بالكتير مش اكتر و لما تقلبيه بتقلبيه زي ما كتبت؟
يعني مش بتلمسيه و و تقلبيه بالمنديل على وشه في الصاج؟ و الله انهارده لو شفتي على صفحه الفيس بوك واحده كتبت تعليق انها عملته و نجح معاها و مبسوطه منه انتى بس سيبيه يخمر شويه بسيطه زياده يمكن الجو كان برد كمان عليه

و كمان ما ترقيهوش اوي 2 مللي كده كويس و اتاكدي بتقلبيه ازاي جوه صاجه الفرن و كمان يكون الفرن حامي اوي

اليوم عملته ولم ينجح لانه ما نفش ومش عارفة ايه السر مع اني اتبعت الخطوات بس طلع طري وشكرا

لازم الفرن يكون حامي جدا و الصاجه كمان حاميه اوي و يتخمر شويه كويسين و ممكن تكون ايدك لمسته؟ او ما قلبتيهوش صح؟ بصي انا لغايه دلوقت ممكن احيانا ما ينفش معايا و لكن اغلب الوقت بينفش بس المهم طعمه في الاخر حلو اوي ما قلتليش ايه رايك فيه؟

رررررررررررررررررررررروعة

أول مره أسمع عن خبز البكاكين

بس شكله جميل وإن شاء الله أجربه

اول مرة اسمع عنه بس حلو اوى وجارى التجربه بامر الله

إيه قصدك اشعل عليه من فوق وتحت بالفرن او فقط من فوق
وو ممكن اعمله بالصاج على النار

انا شغلت عليه النار من فوق و من تحت في وقت واحد بس ممكن لو مش بيشتغلوا مع بعض عندك تشتغلي نص المده بالفرن و النص التاني بالشوايه بس على الصاج ما جربتش

انا هجربة يارب يطلع كويس واكيد هقولك عمل اية

ينفع اعمل بعجينته بيتزا والا لا

إرسال تعليق

Related Posts Plugin for WordPress, Blogger...