الصفحات

بحث

ادخلي ايميلك ليصلك كل جديد

السبت، 8 يناير، 2011

تجربتى الخاصه لزراعه الجرجير و البقدونس بالبلكونه

انا كنت حكيت لكم عن محاولتى للزراعه و انهارده حاعرض زراعتى للجرجير و البقدونس بالتفصيل و الصور ان شاء الله - الزراعه في اي اوعيه تصلح انا زرعت في اواني بلاستك للزراعه و ايضا في علب عندي
 بالنسبه للتربه اي تربه تصلح انا زرعت في بتموس مخلوط مع رمل لان البتموس لوحده خفيف الرمل بيتقل و يثبت التربه معاه و النسبه2 بيتموس ل 1 رمل لكن لو زرعتو في بتموس بس مفيش مشكله  انا اشتريت البتموس من كارفور من قسم الحدائق ال 3 كيلو ب 7 جنيه مصري و البتموس ميزته انه نضيف مفيهوش امراض او ديدان او اي حاجه زي التربه العاديه فا بيكون مناسب للبلكون والمنزل 


بذور جرجير

 بالنسبه للبذور  من عند العطار و رخيصه جدا جيبي ب واحد جنيه من كل نوع انتى عايزاه و لو قالك دي مش للزراعه عادي لانهم بيبيعوها كوصفات علشان تتغلي و تتشرب -هيه  بتتزرع و هما ممكن ما يكونوش عارفين اللي بيبيعو فا قولي عايزه بذر بقدونس و بذر جرجير

بالنسبه للجرجير حطي التربه و فوقيها البذر و فوقها رشه تربه تاني خفيفه و بالنسبه للمياه ضيفي الميه باي رشاش عندك فاضي ممكن رشاش ملمع زجاج فاضي اشطفيه و امليه ميه و رشي بيه على التربه علشان لو صبيتي ميه بكوبايه البذور حتتحرك و تطفو بس
بذور الجرجير بتطلع بسرعه و طعمه حلو اوي






بذور بقدونس



البقدونس نفس الفكره في طريقه الزراعه بس بذوره بتتأخر في التنبيت فا ما تقلقيش لانه اتاخر عندي كتير بالنسبه للجرجير









جربي الزراعه في اي علب فاضيه عندك
لما تاخدي من الزرع قصي بالمقص ما تشديش من تحت لانه المفروض تقصي الزرع و يطلع غيره
كمان خللي الزرع في حته فيها شمس كويسه

ريحان

كزبره شرحت زراعتها بموضوع سابق
يا رب الموضوع يعجبكم و ان شاء الله اي استفسار انا موجوده و ان شاء الله انقل لكم باقي الزرع قريب

14 التعليقات :

شكرا جدا على نشر تجربتك مع الزراعة فعلا شئ رائع واستفدت حاجات كتير وان شاء الله قريبا حبدأ ازرع بعض الخضروات فى البلكونة :)

حاجة فى منتهى الجمال والروعة و انا استفدت منك حيث انى عرفت اماكن شراء مستلزمات الزراعة وجزاك الله خيرا عنى وعن غيرى

كنت عايزه اعرف العلب اللى هزرع فيها اخرمها من تحت علشان الميه تتسرب منها ولا لأ

انا ما خرمتش العلب البلاستك و شوالي الزرع الجاهزه كانت مخرومه و في طبق تحتها

يعنى معلش ارجوكى تردى عليه اخرم العلب والا لا والا اشترى علب جاهزه

شكرا جزيلا المقال رائع واستفدت جدا من انك شرحتي من فين اشتريتي البذور

لازم نخرم العلب لو مش مخرومه من تحت علشان تنزل الماء الفائض عن الاحتياج لانه لو فضل حيعمل تعفن فى قاع الزرع ...... انا عايزه اسأل التربه العاديه ( الطين ) هل نضيف له رمل وهل نستخدمه بنفس الطريقه وشكرا

انا معجب با الموقع انا عندي معلومات في الزراعه والعلب بتتباع جهزع مخرمه اشتريه ولو هتزرع في علبه من عندك اخرمها يعني اخرمها وشكرا للموقع ان جربته اليوم يارب يطلع

شكرا جزيلا المقال رائع

علي حسب علبة التي زرعت فيها الجرجير أنت تقطنين بالبلاد التونسية اذا من أين اشتريت بذور الجرجير لأني بحثت عنها ولم أجدها ساعديني جزاك الله ألف خير

الجرجير زرعته من شهر ونص وطلع أوراق كتير بس للأسف صغيرة شويه والسيقان رفيعة مش زى اللى بنشتريه هل لازم أقص منه عشان يطلع أقوى من الأول ولا أعمل إيه

تجربة حلوة
انا جربت زرعت بقدونس في السطح ونبتت بس قصيرة جدا ولسا ما اكتمل نموها تمام صارت اوراقها صفرا كنت احط لها موية يوم ايوة ويوم لاء ما اعرف صح او لاء اللي يعرف طريقة الري يقلي لو تكرمتو

معليش اختي شنو تقصدين بالبتموس؟يعني سماد صناعي؟

شيء جميل تسلم اّلأيادي، أنا أريد زراعت الريحان (الحبق) والنعناع

لو سمحتو فى معلومات لازم تتضاف علشان مش كل الناس عارفاها يعنى مثلا نسقى الزرع بعد كده بالرشاش بس برضو ولا من كوبايه عادى ونسقى الزرع مره واحده فى اليوم ولا مرتين وكل يوم لا لأ ارجو الرد على الاسئله ديه وشكرا

إرسال تعليق

Related Posts Plugin for WordPress, Blogger...