الصفحات

بحث

ادخلي ايميلك ليصلك كل جديد

الأربعاء، 14 سبتمبر، 2011

تجربتى مع حله الارز الكهربائيه

حله الارز او طباخ الارز موجود حاليا باقسام الاجهزه الكهربائيه في المحلات كلها تقريبا انا باعمل الرز كويس بس المحشي عندي غالبا كان اخر صف ( بيتعجن ) منى و بما انى مش باعمل كتير يا دوب على قد الاكله فالصف الاخير ده يعني نص او تلت الاكله اللي عملتها
فا ناس شكرت لي في جهاز طبخ الارز الكهربائي و اشتريته و دي ملاحظاتي عليه
  • اول حاجه ما شاء الله ولا مره الرز باظ منى فيه ..على طول الحبه بحبتها احسن بكتير من طبخي العادي ليه
  • تاني حاجه اسرع من الطريقه العاديه و خصوصا لو حطيتي الميه مغليه بيستوي بسرعه جدا
  • الجهاز فيه خاصيه انه طول ما هوه في الكهرباء بيحفاظ على ان الرز يفضل دافي حتى لو عملتيته و اكلتيه بعد 5 ساعات بيكون سخن
  • الجهاز بتحطي كل حاجه و تدوسي الزرار و هو يسوي الرز و يفصل لوحده بعد ما يخلص و يشغل خاصيه التسخين الاوتوماتيك
  • انا طبخت الرز العادي و البرام ( بس بيطلع من غير وش طبعا ) و المحشي فيه و كله النتيجه هايله
  • الماركه مش بتفرق انا جهازي صيني و حلو ما شاء الله و كمان سعره حتى في الماركات رخيص مش غالي بالنسبه للاجهزه التانيه
  • في شبكه بلاستيك معاها للتسخين او الطهي على البخار على بال الرز ما يستوي لو كنتى حاطه فراخ مجمده حتلاقيها سخنه جدا و انتى بتطلعي الرز من الحله
عيوبه
  • انا شايفه عيبه الوحيد الحجم حجمه كبير فا لو حتجيبيه فكري في مطبخك و مساحه الرخامه عندك
طريقه التنظيف
  • اول لما تخلصي انقعي الحله لو حاجه اتلزقت منك فيها في ميه ( و ممكن ما تحتاجيش الخطوه دي لو ما تلزقش منك حاجه ) 
  • التنظيف بالاسفنجه نفسها بتاعت جلي الصحون يعني ما تدعكيش بالوش الخشن كله بالناحيه الناعمه  و حينضف معاكي ان شاء الله لو قعدتي تدعكي حيتجرح منك و حيبوظ فانتى من اول يوم حافظي عليها
  • الجهاز من بره امسحيه بقماشه منديه او بجلانس او اي حاجه عندك مفيش مشكله في تنظيفه
  • و انتى بتشتريه جيبي الحله من جوه تيفال مهمه جدا الحكايه دي
طريقه طهي الارز في طباخ الارز الكهربائي
  • انا معياري في الاكله كوبايه و نص باحط كوبايتين و نص مايه يعني بتحطي العيار العادي للطبخ للرز بتاعك لو حتسويه على الغاز و تزودي نص كوبايه هوه بيحتاج ميه زياده شويه
لو مش محتاجاه ما تشتريهوش ما تمليش مطبخك اجهزه كتير روقان المطبخ ميزه لكن لو بيبوظ منك الرز او بتشتغلى و نفسك تنامي ساعه و تقومي من النوم و تلاقي الاكل جاهز لوحده  ان شاء الله يكون مفيد ليكي

فكره : انا محمره شويه شعريه في علبه و ساعه الطبخ باخد منها على طول و احط في الحله و عليه الرز و الملح و الميه و السمن  بكده مش حتحتاجي انك كل مره تحمري شويه في مقلايه و توسخي مقلايه جديده بتوفري وقت و توفري غسيل مقلايه

12 التعليقات :

بجد مرررررررررررررررررررسى اوى كان نفسى حد يجربها ويشرحلى عيوبها وميزاتها وازاى تستخدم مررررررررررررررررسى وشكرا اوى

طيب لوسمحتى قولبلى بتعملى المحشى فيها اذاى بالظبط ولك جزيل الشكر

انا باعمل فيها محشي الكرنب وورق العنب عادي باحط طبقه ورق تحت و ارص المحشي و احط الميه برضه بزياده شويه و هوه بيستوي اسرع كمان من الحله العاديه
عندي صاحبتي بترص فيه محشي الكوسه و الفلفل واقف و برضه بنفس الطريقه

شكرا لكى بس عاوزه اعرف الرز بيطلع مفلفل ولا برده ممكن تعجن الرز

انا عندي النوع الفي الصورة التانيه بسأل عن القطعه البلاستك المخرمه المسماة وعاء بخار ايه الي بتعمل بيها وفين تتخط وقت الطبخ
وشكرا خالص اختي

انا عندى واحده فيليبس بس بتاخد وقت طويل جدا لحد ما الارز يغلى نع انى بحط ماء ساخن

إرسال تعليق

Related Posts Plugin for WordPress, Blogger...