الصفحات

بحث

ادخلي ايميلك ليصلك كل جديد

الاثنين، 3 سبتمبر، 2012

افكار للتسخين و الطهي بالميكروويف

موضوع من منتدي فتكات رائع جدا فيه افكار لاكلات و استخدامات متنوعه للميكروويف غير التسخين
بالنسبه للطبخ في مقالات كتير و اراء بتقول ان الطهي في الميكروويف صحي و اراء انه لاء لكن عموما الاكيد ان طهي الخضروات فيه امن و انا باعمل فيه المكرونه بالبشاميل و ممكن الجلاش و عملت فيه فشار الافكار كثيره في الموضوع اذا كنتي مع الطهي بالميكروويف ان شاء الله تعجبك  الافكار
اتركك مع الموضوع
من سنة ونص قررت أجيب الميكرويف
الحقيقة هو دويوتو مع حاجة تانية مهمة جدا هو الديب فريزر

كمان عشان سكني بعيد عن الاسواق فكنت مضطرة اني اجيب الأكل بكميات و احفظها
 في الفريزر
وقع اختياري على ميكرويف اوليمبيك 36 لتر بالشواية

هو حجمه مناسب لينا و كمان الشواية بتحمر وش الصواني أو الفراخ

دلوقتي حاقولكم ايه اللي باعمله في الميكرويف
 :
1- تدفئة اللبن الصبح للأولاد باحط اللبن في الكبايات و باضبط الحرارة على
 الهاي باور لمدة دقية واحدة بس
بيطلع دافي و مضبوط و ما وسختش كنكة و لا لبانة يدوبك الكبايات

2- مج النسكافيه بتاع الصبح اللي بيفوقني باحط برضه المج فيه الميه و باكو
النسكافيه و حبة لبن و ادوس زرار المشروبات
بياخد دقيقة و 20 ثانية .مفيش اجدع من كده

3- العيش سواء كان بلدي و لا فينو ولا توست متجمد في الفريزر بياخد دقيقة
 تقريبا و اتفرجي على العيش أكنه لسه مخبوز 


و كمان لاحظت ان الولاد ما شاء الله شهيتهم اتفتحت
 لأن العيش بقى يفتح النفس فعلا
4- لو عندي كفتة ولا بانية فايض ممكن اسخنه دقيقتين و اعمله في ساندوتشات
الأولاد الحقيقة مش بينشف زي ما تسخنيه على النار
5- ساندوتشات الجبنة السايحة يا سلام بقى و الحلو ان العيش بيبقى طري كمان
 مش بينشف زي التوستر
كمان لو عندك ساندوتشات فايضة من قبل كده بتسخنيها بس خلي بالك لو فيها
كاتشاب بتبقى سخنة من جوة زيادة بس حلوة برضهو البيتزا الجاهزة لما تسخنيها الجبنة بتسيح تاني اكنها لسة معمولة وما بتنشفش زي الفرن
5- أهم حاجة بقى تسييح اللحوم و الدواجن المجمدة وده كان هم كبير و انزاح
 من على قلبي
6- كثير قوي بيفيض مني أكل زي المحشي و المكرونة بالبشاميل و الرز و الفتة و
الأولاد ما يرضوش ياكلوا الأكل يومين ورا بعض
الحل سهل اتاويه في الديب فريزر كام يوم و اطلعه افككه و اسخنه بيبقى أكنه
 طازة 



7- نيجي بقى للمفيد مش قلت لكم باطبخ فيه ؟
 

1-اسهل حاجة باعملها الفراخ المشوية : باطلع طبق الفراخ من الفريزر اعمله ديفروست بياخد 23 دقيقة ( انا باجيب اطباق وراك كوكي فريش الكيلو بكميات و احطها في الفريزر) بعد ما تفك باغسلها كويس و اتبلها بالملح و بهارات الدجاج (دي بتديها طعم رائع ) و اغرزها بالسكينة و احطها في طبق بايركس و تدخل الميكرويف
على الهاي باور لمدة 20 دقيقة و بعدين افتح الشواية 6 دقائق و خلاص بقت
 جاهزة بصراحة طعمها روعة
يعني موفرة للوقت بشكل فظيع و في نفس الوقت اعمل مكرونة و سلطة و بقى الغدا
جاهز في ساعة الا ربع بس
2- الرز المعمر : ده بقى عايزة اشكر فيه من هنا للصبح . انا عادة لما كنت
 اعمله في الفرن كان بيشيط يا اما مايستويش
عملته في الميكرويف في طاجن بايركس حطيت الرز ومعاه لبن و شوربة و سمنة و
عملته على الهاي باور خد 25 دقيقة (الطاجن كان كبير ) طلع مستوي وطري
و بعدين حطيت قشطة و فتحت الشواية اتحمر الوش و كان جميل جدا

كمان عملته بالفراخ بس حمرت الفراخ بره و بعدين رصيتها في الطاجن و وفوقيها الرز المغسول و زودت لبن وشوية مية ( عشان الفراخ حتستوي جوة الرز وضبطت الملح (الأربع وراك عملت عليهم كبايتين رز و كباية لبن و كباية ماء خدت 25 دقيقة و كانت جميلة جدا الرز واخد طعم الفراخ روووووعة 
3- الأكل الدايت : الميكرويف حبيبي ده رفيقي في رحلة الدايت لاحظي اني حاعمل أكل لفرد واحد و بكميات صغيرة
باجيب الطبق البايركس (اللي هو غطا الحلة البايركس ) و باحط فيه قطعة
 الفراخ منزوعة الجلد ( متفككة مش مجمدة)مع شوية خضار مجمد (عشان يبقى السوا واحد) و ما كانش بياخد غير 10 دقايق بس و في تنويعات تانية سمكة او قطعة فيليه سمك او فراخ او ستيك مع السوتيه بجد كان بيسهل عليا جامد
الفطار كمان باكسر البيضة في الطبق البايركس فوق قطعة توست بني من غير زيت
ولا سمنة تحصلي على اومليت صحي تنويع عن البيض المسلوق
و ساعات كمان كنت احط على التوست جبنة قريش بتسيح شوية و تفتح النفس

4- صينية سمك فيليه : دي ولادي بيحبوها جدا و خفيفة عن السمك المقلي و
 نضيفة عن السمك المشوي اللي بيهبب الايدين
باحط في صينية بايركس بصل شرايح مع فلفل اخضر و طماطم و بطاطس شرايح رفيعة و
 فوقيهم شرايح السمك الفيلية و اعصر عليهم ليمون و ملح وكمون و تدخل تقريبا ربع ساعة
5- المكرونة بالبشاميل : باعملها في صينية بايركس بتاخد 25 دقيقة و كمان 6
 دقايق 
تحت الشواية عشان الوش يحمر

6- هنا طريقة عمل صينية القرع العسليصينية القرع العسلي ...لذيذة و سهلة و كمان مفيدة 
http://forums.fatakat.com/thread562981
7- الحواوشي : بافرم البصلة على لحمة مفرومة و طماطم مفرومة وفلفل و ملحوتوابل و احشي بيها العيش بياخد 10 دقائق بس بيطلع طري لو عايزاه ناشف شغليالجريل عليه
8- الخضار بكل انواعه في طاجن بايركس او فخار بياخد 10-20 دقيقة

مرة عملت طاجن بامية في عزومة انبهروا بيها جدا

ميزة الميكرويف انه بيحافظ على طعم الخضار لأنه مفيش لهب مباشر جاي عليه

9- المحشي : تحية جامدة بقى للميكرويف عملت المحشي طلع طعمه خطييييير اولا
مستوي حلو و ما اضطريتش احط ورق من تحت لأن مفيش لهب يشيطه
قدمته في الحلة البايركس كان شكله شيك جدا و الأحلى انه خد 25 دقيقة بسسسسس

10- ممكن تسوي فيه المكرونة و الرز بس للأمانة محصلة تسويتها في البوتجاز
 بس اهو يسد لو الأنبوبة خلصت مثلا
- في العزومات كمان بيساعد جدا لأني باجهز الأكل في اطباق التقديم و وقت
 الأكل اسخن ورا بعض و اطلع على السفرة
لو بتعملي ساندوتشات بكميات على ما تخلصي يكونوا بردوا تروحي مسخنة كله مرة
واحدة و تقدمي

لسة لسة ما خلصتش
 :
8- انا كنت فاشلة جدا في تسييح الشيكولاتة ولا مرة نفع معايا الحمام المائي
 و الكلام ده
انما نجحت مع الميكرويف .حطيت في سلطانية صيني الشكولاتة الخام مع معلقتين
 لبن و حتة زبدة و قللت الباور ل 40 ساحت الشكولاتة آخر تمام
برضه لأن مفيش لهب مباشر . ممكن تتحط على وش الجيلاتي او تزيين التورت او
البتيفور
9- تطرية الزبدة :لما أكون حاحضر الكيك باطري الزبدة الباردة اني اقلل
 الباور و اديها دقيقة يدوبك تطرى انما لو حطتيها على النار حتسيح ما ينفعش
10 - تخمير العجين :زي عجينة البيتزا مثلا بتقللي الباور خالص لحد 10 و
 تسيبي العجينة 10-15 دقيقة بتلاقيها خمرت و ارتفعت
شوفتوا بقى كل دي مميزات بيوفرها لنا الميكرويف مش بس التسخين

يعني اللي عندها ميكرويف كبير و قدرته حلوة لازم تستغله كويس

عايزة بس اقول اني زي ما نجحت في حاجات كثير في حاجات الميكرويف فشل فيها

يعني مثلا الكيك لقيته بيطلع ابيض خالص

سمعت برضه ان البطاطس الفروزن تعمليها في الميكرويف و هي مجمدة ما نفعتش
برضه و طلعت ناشفة جدا
انما غير كده زي الفل و الحمد لله
مميزات الميكرويف :
1- بيوفر الوقت

2- بيقلل وقت طهي الطعام

3- بيحافظ على الطعم

4- حتوفري في غسيل المواعين
 لأنك مش حتستخدمي حلل تسخني فيها
5-بيوفر في الكهرباء

6- بيقلل الضغط العصبي الناتج عن ضيق الوقت
 و المفجآت
7- ممكن تطبخي كميات قليلة جدا من الأكل

8- بعض الأكلات تسخينها في البوتجاز بيبوظ شكلها زي الفتة او الكشري لو
 اتغرفوا
انما في الميكرويف حتسخنيه بنفس شكله و في طبق التقديم

9- كل مرة بتحصلي على الأكل بنفس درجة الحرارة المطلوبة

10-مش لازم تفضلي واقفة تراقبي الأكل و هو بيسخن اضبطي الحرارة و الوقت و
 هو لما يخلص حينده عليكي
 

المصدر http://forums.fatakat.com/thread1962701

2 التعليقات :

أشكرك جزيل الشكر لأنه أفكارك رائعة واكيد لازم أجربها ..

شكرا جدا على النصايح الجميله دى بس انا مشكلتى ان عندى ميكرويف سامسونج ومش عارفه استخدمه غير فى التسخين بس

إرسال تعليق

Related Posts Plugin for WordPress, Blogger...