الصفحات

بحث

ادخلي ايميلك ليصلك كل جديد

الأربعاء، 16 يناير، 2013

ملف متكامل عن غسالة الاطباق وايت ويل, شرح الاجزاء,البرامج,رص المواعين,توفير وبالصووور

 ملف متكامل عن غسالة الاطباق وايت ويل, شرح الاجزاء,البرامج,رص المواعين,توفير وبالصووور
دي صوره الغساله :




 أولا: الاجزاء الخاصة بغسالة الاطباق ومكان وضع المنتجات 1- الملللللح وده اهم حاجه طبعا...مهم للغسالة نفسها علشان الملح بيفك اي ترسبات ممكن تسد الغسالة من جوه
ولو الغسالة محتاجة ملح هتلاقي اللمبة بتاعة الملح اللي في الصورة اللي فوق نورت اول ماتدوسي على زرار التشغيل
هتفتحي الغسالة وتطلعي الرف التحتاني لبره هتلاقي مكان وضع الملح في قعر الغسالة نفسها


 زي منا كاتبالكم في الصوره هنفتح الغطا هنلاقي فتحه كده فيها مية هنحط فيها القمع اللي جاي مع الغسالة (او اي قمع عندك في البيت بس تكون فتحته واسعه شويه) وتحطيه في الفتحه وتصبي الملح...غسالتي بحطلها كيلو ملح كل مره وبيقعد فترة طويلة على ماتحتاج تاني
ادي صورة الفتحه بعد ماشلنا الغطا


  وادي صورة القمع وهوه متركب في الفتحه ونصب الملح

  خلاص الحمد لله حطينا ملحنا وغسالتنا كلت وشبعت...نقفل الغطا مانسيبوش مفتووووووح
***************************************

2- مساعد الشطف..ده يابنات مهم في انه بيخلي الصابون بتاع الغسالة يتشطف بسهولة لان الصابون بتاعها بيبقى قلوي اوي وصعب يتشطف فده مهم لكده وبرضو مهم في عملية التجفيف..(الغسالة بتنشف المواعين في الاخر وبتحتاجه لكده)
والسائل ده ليه لمبة برضو من بره بتنور لما الغسالة بتحتاجه
وهقولكم على تكّة كده مهمه عن مساعد الشطف ده في الاخر علشان انا عارفه انه بيسبب مشكلة لبعض الناس بيشتكو من ان المواعين بتطلع مجيّرة او عليها رواسب بيضة هقولكم نحلها ازاي

دلوقتي هنركز على باب الغسالة من جوة هنلاقي مكان الصابون ومكان الزيت
ده مكان الزيت وهوه مقفول


 لما نيجي نفتحه نحرك الغطا باتجاه السهم بحيث انه يشاور على المثلث الفاضي ونقوم شادينه لفوق

كده



 نصب السائل ولما تتملي نتاكد من حاجة مهمة جداااا ان المؤشر يكون على 2 او 1 ماتزوديش عن 2
المؤشر بتحركية بسكينه او معلقة وخليه على 2 زي منا عاملاه

 
 يابنات الحتة دي مههمة جدا في ناس كتير بتغلط بانها بتزود المؤشر بتاع السائل على اخر حاجه وده مش بس بيستهلك السائل لا هوه
ده اللي بيسبب الرواسب البيضه اللي كتير بيشتكو منها لانه هوه نفسه بيترسب على المواعين...جربي كده اعملي المؤشر بتاع السائل على 2 او 1
وانتي هتدعيلي لما المواعين بتاعتك تطلع بتلمع وزي الفللل
************************************************** ***********
3- الصابووووووووووووووووون...مهم جدا طبعا من غيره مافيش حاجه هتنضف
هتلاقو المكان بتاعه زي علبة مربعة جنب المكان بتاع السائل على طول في الباب من جوه
ده شكله



ملف متكامل عن غسالة الاطباق وايت ويل, شرح الاجزاء,البرامج,رص المواعين,توفير وبالصووور
 ودي الملعقة اللي جاية مع الغسالة بتعايري بيها الصابون وتحطيه
في مكانين للصابون مكان البري وواش ومكان الغسلة نفسها
في بعض البرامج بتحتاج انك تحطي صابون في المكان المخصص بتاع البري واش وفي برامج لا وهقولكم عليها لما نيجي نشرح البرامج
نحط ربع الكمية في الpre washوالباقي في المكان العادي\


 كده يابنات بكون خلصت شرح الاجزاء واماكن وضع الحاجة
الرد الجاي هشرحلكم الطريقة الصحيحة لرص المواعين علشان تاخدو افضل نتايج
وهشرح البرامج واحد واحد وامتى نستعمل مين فيهم
وهقولكن على كام حاجة حلوة تعملوها وكمان ازاي توفري في المنتجات بتاعتها وباذن الله هتدعولي

 نبتدي بسم الله في طريقة رص المواعين

 زي منا كاتبالكم في الصورة على انواع الحاجات اللي هنرصها في كل رف
دلوقتي همسكهم رف رف ونشرحه بالتفصيييل


أولا: الرف اللي تحت
بنرص فيه المواعين اللي فيها دهون او اتاكل فيها طبيخ يعني

ملف متكامل عن غسالة الاطباق وايت ويل, شرح الاجزاء,البرامج,رص المواعين,توفير وبالصووور
الجزء رقم 1:
ده يابنات عادي خااالص بنرص عليه الاطباق بجميع انواعها
الجزء رقم 2:
ده عبارة عن جزئين..الاتنين زي بعض بالظبط..فيهم فتحات كد بنعلق كل ملعقه في فتحه زي الصوره
الجزئين ينفع تفكيهم من بعض وتخليه جزء واحد لو الملاعق قليلة او ركبيهم لو الملاعق كتير
كمان ممكن تفكي الغطا المخرم اللي فوق ده من اي واحد وتحطي فيه الملاعق الكبيرة شوية او فتاحة العلب
او اي حاجه كبيرة شوية على انها تدخل في الفتحة بتاعة الملاعق
والصورة اهي

 
 يارب تكونو فهمتوها..انا شايله الغطا العلوي المخرم بتاع الجزء اليمين وحاطاه على جنب اهو
هيبقى من جوه عامل زي جيوب فاضية حاطالكم فيه صفاية وملعقة كبيرة

كل ده كنا في الجزء رقم 2 ...متابعين معايا؟؟

ندخل على الجزء رقم 3
الجزء ده يابنات بنفع يتعمل مسطح زي منا عاملاه او فيه رفين بيترفعو بحيث انهم يشيلو اطباق زي الجزء رقم 1
بس انا غالبا ببقى منزله الرفوف علشان بحط عليه حلل متوسطة
الحجم او علب ميكروويف او سلطانية كبيره
او اي حاجه مقعرة عموما
زي الصورة\


 خلي بالكم يابنات الحلة او اي حاجة مقعرة لازم تتحط مقلوبة لان لو تاخدو بالكم في رشاش في قعر الغسالة هتلاقوه في الصورة بتاعة الملح
بيلف ويضخ المية لفوق فبتغسل الحلة من جوه
كمان مينفعش نحط الحاجات فوق بعض لان كده حاجات المية هتنضفها وحاجات المية مش هتعرف توصلها فاهمين قصدي؟؟؟
يعني لو حطيت حلة فوق حلة..أللي تحت هتنضف بس اللي فوقيها لا
كمان يابنات عايزاكم تاخدو موضوع رص المواعين ده زي لعبة المعكبات كده او البازل
ظبطي مواعينك ورصيها بحيث انك تخلي الغسالة تاخد اكبر كمية مواعين ممكنة من غير ماتكربسي الحاجت فوق بعض
ظبطيها انتي وشطارتك


ملف متكامل عن غسالة الاطباق وايت ويل, شرح الاجزاء,البرامج,رص المواعين,توفير وبالصووور
 ثانيا : الرف اللي فوق:
الرف ده يابنات بنرص فيه المواعين الخفيفه شوية زي اطباق الفاكهة وكبايات الشاي والعصير وكاسات الايس كريم وبيالات الشوربة
يعني متوسخة على خفيف

الجزء رقم 1
ده بنحط فيه اي مغرفه او كبشة اي حاجه طويله وكبيرة زي الصورة وفي منه اتنين على الناحيتين

الجزء رقم 2
ده بنرص فيه الكوبايات والماجات بانواعها ولازم تكون مقلوووبة

الجزء رقم 3
زي مانتو شايفين هتلاقوه عبارة عن رف صغير وجنبيه جزء مطيول ممكن ترصو فيه اطباق الجاتوه او اطباق الفاكه
او تحطي فيه مغرفة برضو تنيميها فيي الجزء الطويل
او ساعات رص كوبايات برضو او اطباق الشوربة او اطباق الكريم كراميل اي حاجه من الحاجات دي واي حاجة مقعرة
سواء كبيرة او صغيرة لازم تكون مقلوووووووووووبه

الجزء رقم واحد واتنين مكررين في الرف اللي فوق نفسه يعني ناحية يمين وناحية شمال فاهميني؟؟
يعني نحط مغرفة تانية على الناحية اليمين وكوبايات برضو
انا بس مصورة الصورة من الجنب

خلصنا كده رصينا المواعين الحمد لله وكله متستف وتمام
شايفين الصورة دي
 ملف متكامل عن غسالة الاطباق وايت ويل, شرح الاجزاء,البرامج,رص المواعين,توفير وبالصووور
البتاع الابيض الطويل ده اللي متعلق في الرف اللي فوق عبارة عن رشاش بيدور برضو وبيضخ المية في الحاجات اللي مرصوصة فوق
ولازم نتاكد اننا مانحطش حاجه طويلة اوي في الرف اللي تحت بحيث انها تمنع الرشاش ده من انه يلف
يعني لما ترصي مواعينك...دخلي الرفوف جوه الغسالة ولفي الرشاش الابيض ده بصباعك كده اتاكدي ان مفيش حاجه طويله بتخبط فيه وتخليه ميلفش فاهميني يابنات؟؟
لانه لو ملفش الحاجات اللي مرصوصه فوق مش هتنضف خالص

البرامج  :
 
 هناخدهم من الشمال لليمين
1- Strong:
ده اقوى برنامج مدته ساعتين ونص تقريبا
البرنامج ده بنحطله صابون في الwash والpre wash
ده بشغله للحلل والصواني الستانلس او البايركس او الاركوبال او التيفال او علب الميكروويف بانواعها
اي حاجه كبيرة وبتحتاج تنضيف ولاااازم تكون بتتحمل درجة الحرارة العالية
بس خلي بالك لو الحلة متوسخة اوي والدهون لازقة عليها جامد اوي زي الاكل المحروق او الصلصةا لمحروقة الغسالة مش هتقدر تطلعها

برصهم ازاي؟؟
بشيل الملاعق والحاجات الصغيره علشان افضي مكان
وبرص تحت حوالي تلات حلل متوسطين او اكتر لو صغيرين كلهم مقلوبين طبعا
وفوق ممكن احط صينيه تيفال مقلوبة ولو في مكان بحط كوبايات
البرنامج ده بشغله لما يكون عندي حلل وتعبانه ومكسلة اغسلهم...بملاهم مية دافية في الحوض واسيبهم شوية وبعدين ارصهم فيب الغسالة(كسل فظيع انا عارفه)
بس الغسالة بتطلع الحلل ممتازة والتيفال يجنن بس مش اوي مع البايركس لو لازق فيه حااجات

2-Normal
ده برنامج عادي درجة حرارة عالية برضو بس اقل من اللي قبله
وبيحتاج نحط صابون في الwash وال pre wash
ده بستعمله لو مواعين عادية ونشفت او قعدت مدة في الحوض يعني اطباق عادي وعلب ميكرويف وكوبايات بس بقالهم شوية
وده مش فاكرة مدته بصراحه بس تقريبا ساعة ونص

3- Economy
ده برنامجي المفضل
مدته ساعه وبيحتاج نملى الwash بس ومالوش pre wash
ده درجة حرارة متوسطه حوالي 45
ده بحط فيه المواعين اليومية وكمان البلاستيك العادي ده علشان درجة الحرارة مش عالية
فعلا ممتاااز بس تكون المواعين طازة..لو ناشفة مش هتنضف اوي
في حركة بعملها بس دي لما بيكون الكسل مسيطر عليا اوي
بسد الحوض عندي وبملاه مية دافية وبغرق المواعين فيه
اسيبهم شوية وبعدين ارصهم واعملهم على ايكونومي بيطلعو ممتازين
وفي حركة احسن رصي المواعين اول باول ولما الغسالة تتملي شغليها ودي اكتر طريقة موفرة للوقت
والبرنامج ده حلو اوي لو كان عندك عزومة والمواعين كتير وعايزة تنجزي

4-Rinse
ده برنامج شطف عادي خالص لو عندك كاسات او حاجات خفيفه محتاجه شطف بس
درجة حرارة 30 ومبتحطيش صابون خالص
الفني بتاع الشركة قالي انه حلو لغسيل الفاكهة والخضار بس مجربتوش بصراحه

5-Glass
ده للكاسات الكريستال والحاجات الرقيقة ودرجة حرارة خفيفة وبتحطي صابون قليل اوي حوالي ربع الملعقة برضو مجربتوش

6- Rapid
ده برنامج غسيل سريع بس لو المواعين فيها دهون مش هينضفها
يعني برضو للحاجات المتوسخه خفيف زي كوبايات الشاي والفاكهة والحاجات دي
وبتحتاج صابون قليل في الwash بس
لكن دهون وحاجات ملزقة نو نو

7-Soak
ده بتشغليه علشان يبل المواعين قبل ماتبئي برنامج تاني لو المواعين ناشفه
بس شايفه انه مالوش لازمه لو المواعين ناشفه بحطها على برنامج نورمال او سترونج وخلاص مره واحده

كده الحمد لله خلصنا البرامج
وهتلاقو شرحها في كتالوج الغسالة
عايزه اقولكم على كام ملحوظة صغيرين قبل ماندخل في التوفير
1- في بنات كتير اكيد هيقولو ياااه ايه ده كله والرص ده متعب وبتاع بس والله مع الوقت سهل جدااا وغسالة الاطباق دي فعلا ممتااااااااااااااازة
هتعرفي انتي ازاي تتعاملي معاها وترصي المواعين بسرعة البرق
كمان لو عايزة توفري وقت ممكن ترصيهم اول باول...انا عندي الغسالة بتاخد مواعين اليوم كله واي حاجة بتتوسخ
باخدها في ساعتها وبرصها فيها واقفلها ولما تتملي على اخر اليوم بشغلها
انما لو في عومة ومشغولة...بملى الحوض مية دافية وبغطس المواعين فيه وبعد مالناس يمشو والدنيا تهدى كده بقوم راصاهم في السريييع واجري اناااااااام

2- في بنات برضو هتقول ان الغسالة برامجها طويله وان غسيل المواعين على الايد مبياخدش حاجه
انا عن نفسي اكتر حاجة بكرهها في شغل البيت هيه غسيل المواعين على ايدي
وبعدين الغسالة فعلا حلوة في انك بتشغليها وتروحي بقى تعملي اي حاجة تانيه وراكي
يعني شغليها وروحي نضفي بقية المطبخ وعلى ماتخلصيه تكون هيه خلصت

3- اعملي دورة خل كل شهر لغسالتك علشان يشيل الرواسب

نيجي بقى للتوفييييييييييير
طبعا كلنا عارفين اسعار فينيش وفعلا اسعارها غاليه
وللاسف في منتج مصري اسمه فيبا انا بصراحه مربتوش بس اسمع انه مش حلووو
في بقى منتج اكتشفته في كارفور صناعة تركية بس ممتاااااااااااااااااااااااز اسمه GIZ
ونص تمن فينيش!!!
ولو انتي كسولة زيي وبتشغلي الغسالة كتير هتلاقيه هيوفر معاكي جااامد
ووالله بينضف زي فينيش بالظبط ويمكن احسن..جبت منه الصابون والملح ولسة هجرب السائل ان شاء الله ممتاز فعلا ودي صورته
الصابون


المصدر http://forums.fatakat.com/thread2230524
Zooba

0 التعليقات :

إرسال تعليق

Related Posts Plugin for WordPress, Blogger...