الصفحات

بحث

ادخلي ايميلك ليصلك كل جديد

الأربعاء، 5 يونيو، 2013

ميزانيه وجدول لشهر 6 مع كيفيه عمل ميزانيه لنفسك لوحدك بدون مساعده

من منتدي فتكات العضوة happy ahmed هي صاحبة المشاركة
انا شايفه ان كل واحد عنده ظروف مختلفه فكل واحد بيظبط جدوله وميزانيته على قد راتبه يعنى مثلا اللى جوزها بيقبض 3000 غير اللى بيقبض 500 غير اللى بيقبض 1200 وغير 300 وهكذا
فأنا شايفه من وجهه نظرى ان كل واحده بتنظم بيتها وجدولها 
\ وده جدولى وزى ما قلت ده بتاع ميزانيتى انا كل واحده تقدر تاخذ منه افكار لميزانيتها هى

اولا احنا اسره من 5 افراد
1 - نص ك لحمه + باميه + ارز
2 - باقى الأكل + ملوخيه + سلطه
3- نص بانيه + مكرونه +سلطه
4 - قرنبيط +بطاطس = طحينه
5 - سمك بلطى مقلى + ارز +سلطه او طحينه
6 - محشى بذنجان + فرخه
7- باقى الأكل + كشك
8- مكرونه بشاميل + سلطه
9 - صينيه بطاطس بالفراخ + ارز
10 - فول بيتى و طعميه بيتى و سلطه
11 - كفته + مكرونه + سلطه
12 - طواجن مكرونه بالكبده + داقه
13 - محشى + فراخ + كشك + مخلل
14 _ باقى الأكل + ملوخيه
15 - كفته ارز معها بطاطس مطبوخين بالصلصه + ارز
16 - فته + نص كيلو لحمه + مخلل
17 - بواقى كل الأسبوع + مكرونه محمره
18 - نص كيلو كبده + مكرونه + سلطه
19 - مقلوبه + نص ك لحمه + سلطه
20 - كبسه بالفراخ + دوجس
21- بواقى الأكل
22 - شكشوكه +فول بالسجق + مخلل
23 - داوود باشا + مكرونه +سلطه
24 - بانيه بشاميل + مكرونه وايت صوص + بروكلى بشاميل ( اهه يوم تفاريح علشان يحسوا انكم اكلوا فى الشارع او فى مطعم شيك )
25 - طاجن خضار + نص ك لحمه
26 - جلاش باللحمه المفرومه + ممبار
27 - سجق اسكندرانى + عيش +طحينه
28 - نص كيلو بوفتيك + مكرونه
29 - بذنجان وبطاطس + طعميه + سلطه او طحينه
30 - فته شاورما بربع كيلو بوفتيك مستورد
31 - كشرى اصفر + بيض = دقه وصلصه

  انا بجيب كل شهر::::: 2 كيلو مفروم مستورد مانستغناش عنها فى المطبخ انا مسمياها المنقذ
كيلو كبده مستورد
كيلو سجق مستورد
كيلو بوفتيك مستورد
2 كيلو لحم ضانى بلدى معلش باء سمحونى مش بعرف اكل اللحم الخضار مستورد
4 فراخ
1 بانيه واوقات الغى حسب الجدول

وبقسم كل حاجه على نصيين ماعادا الفراخ بعمل الواحده بحالها
بعمل كل اسبوع فرخه يباء 4 فى الشهر

الحلويات بعمل 3 مرات فى الأسبوع لان فى حلويات ممكن تقعد اكتر من يوم يعنى 12 مره فى الشهر
4 ايام كيكه
2 يوم ارز بالبن
2 يوم جلاش بالكستر او بالسودانى
4 ايام جيلى بالكستر
وممكن يوم بسبوسه وممكن لا حسب لو عندى حاجتها ومش هشترى

نيجى باء عند الأفطار والعشاء :::::::::
عسل وقشطه
حلاوه
جبنه وطماطم
فول
طعميه وسلطه سندوتشات فى عيش زى الجاهزه
عسل وطحينه
كيكه وشاى
بقسمتط وشاى باللبن
بيض
طبعا مش كل دول على حسب اللى عندك ادى بى الغرض



اساليبى فى التوفير ::
1 - قررت ماجبش اكياس الزباله دى تانى واستعمل بتوع الشوبينج
2 - قررت ما اولعش نور فى الشقه خالص غير المكان اللى قاعدين فيه لانى الأول كنت لازم اولع فى كل غرفه اباجوره وكمان فى الريسبشن واحده
دلؤتى باء عملت ايه ؟؟؟ هقولكم
احنا طوول النهار قاعدين فى الليفنج فجبت اباجوره وحطيت فيها لمبه موفره وبفتحها ومش بشغل النجفه خالص لان النجفه فيها لمبات كتير فطبعا كده احسن
3 - المناديل بجد كانت فلوسى كلها طالعه على المناديل طول ما انا قاعده هاتى منديل علشان امسح فم اختك او رياله اختك او ايد اختك وهكذا وخصوصا ان عندى طفلتين سنهم صغير ورا بعض فبستعملهم كتير عملت ايه باء فى الحكايه دى ؟؟؟ هقولكم
جبن فوطه صغيره اللى هى النسائيه دى صغيره خالص كده وبلتها مياه وشويه ديتول وعصرتها وحطتيتها حنبى فى كيس صغير جنب اعدتى اى حاجه تحصل امسح بيها للعيال طبعا بتوفر جامد وبتقعد معايا طوول الييوم .. وكمان لما بنزل الشارع لو راحه النادى او راحه مكان هقعد فى كتيير بخدها معايا فى كيس صغير فى الشنطه بدل المناديل المبلله يعنى ... بجد جربوها هتدعولى
بس لازم تحطوها فى كيس علشان الجو حر هينشفها
4 - بطلت اشترى الرافهيات اللى مالهاش لازمه وانا فى الماركت وبقيت اكتب ورقه قبل لما اروح بكل اللى محتاجاه الشهر ده وده طبعا بعرفه من خلال الجدول بتاعى وبخد فلوس معايا على قد الحاجه او بالتقريب وممكن اخذ 50 او 100 زياده احتياطى لو الحاجه غليت مثلا
5 - السوق بطلت اروح زى الهبله كده اشترى وخلاص اى حاجه المهم امللئ الثلاجه لا .. بقيت اقسم الجدول اسبوعيا واشوف احنا هناكل ايه الأسبوع كله واكتبه وانزل كل جمعه او اى يوم محدد اجيب الخضار بتاع الأسبوع وعامله ميزانيه لنفسى من 40 ل 50 جنيه بالفاكهه يعنى مشوار السوق كل اسبوع 50 جنيه على 4 اسابيع فى الشهر 200 جنيه انما الأول كنت بجيب ب 100 فى المره الواحده وحاجت ممكن تترمى وتبوز وحاجات مش محتجاهاا اصلا
6 - حاجه مهمه جدا ودى بالذات خدوا بالكم منها كويس انى قلت انى فى السوق عامله حسابى على 50 ممكن اجيب الحاجات مثلا ب 45 او 43 او اقل وخلاص طيب اعمل ايه فى الباقى لو فضل معاكى هتصرفى فى تفاهات لا هاتى بى اى حاجه من السوق مثلا زجاجه زيت او كيس سكر او ارز او صل3ه اى شئ وشيليها فى كارتونه مخفيه بعيد عن ايدك خالص وانسيها هتلاقى نفسك بعد شهرين كده او 3 جبتى حاجت الشهر الثالث كلها ووفرتى ثمن البقاله كلها واستفادى بالشهر ده اللى مش هتجيبى فى حاجات البقاله هاتى حاجه البيت محتجها او انتى او وضبى بيها حاجه فى البيت او دخليها فى بند التوفير وده الأحسن طبعا ورمضان داخل علينا اهه وياريت من دلؤتى تعملى كده هتلاقى على رمضان عندك شويه حاجات كملى عليها باء اللى انتى عايزاه
7 - وطبعا لغيت حاجات كتير جدا فى حياتى كنت مشتركه فيها مالهاش لازمه عروض وحركات يعنى بأشتراك شهرى
8 - بجيب فول مدشوش وفول عادى وبعمل انا فى البيت فول وطعميه و الكيلو طبعا بيعمل كتير بشيلهم فى الفريزر فى اكياس وبطلع منهم وقت اللزوم او الزنقات او الفطار والعشاء طبعا اوفر كتير جدا من الجاهز كيلو الطعميه اللى بعمله بيعملى 7 او 8 اكياس من ام جنيه ونص اللى بنشترى جاهز
9 - بجيب العيش ابو شيلن طبعا بيفرق جامد عن ابو ربع
10 - دى باء نقطه مهمه جدا ركزوا فيها انا بجيب كل شهر كيلو لبن بودره من عند العطار ب 36 جنيه بيقعد معايا طوول الشهر وساعات بيفيض منه كمان بعمل بى كل حاجه حلويات وكشك وشاى وكل شئ بجد بيوفر معايا جدا بدل اللبن العلب او السايب بجد هتستفادى كتير جدا وهو بيباء لبن من سنغافوره ممتاز اسئلوا عليه وجربوا هيعجبكم جدا وهيوفر حامد معكم
11 - لما يفيض اكل عندى ومغضوب عليه بحطه فى علبه بغطاء فى الثلاجه واشيله فى الفريزر اهه بينقع وقت الزنقات
12 - لما تيجى تعملى اللحمه انا بجيب 2 كيلو بقسمهم على 4 اكياس او 5 على حسب حجمها المهم كل ما اجى اطبخ منها اشيل واحده من الكيس واشيلها والتانى وهكذا لغايه لما الاقى عندى كيس 6 زياده فاهمنى
13 - وبخصوص النور انا قرات قبل كده ان المايرويف وهو مش شغال برده بيسحب كهرباء والمشترك ابو لمض والشاحن اللى عالطول فى الفيشه ... المهم انا قررت دايما اقفل اى جهاز اشيل فشته بدال مش شغال ولما اجى اشغله احطها فعلا بيفرق


 ميزانيتى خسب داخلى ممكن كل واحده تخذ نفس الأفكار على حسب ميزانيتها هى وان شاء الله هتظبطها صح
وطبعا ماتنسوش اهم حاجه الصدقه قبل اى شيئ
مصدر الموضوع http://forums.fatakat.com/thread4428539

1 التعليقات :

جزاكي الله خير موضوع رائع وكلام عملى 100%

إرسال تعليق

Related Posts Plugin for WordPress, Blogger...