الصفحات

بحث

ادخلي ايميلك ليصلك كل جديد

الأربعاء، 15 يناير 2014

دعوة لكل من رغبت بالتغيير وفشلت


موضوع متميز جداااا من منتدي عالم حواء ل بمبونة حسيته ممكن يغير حياه كتير مننا اتمني يفيدك و كل سطر فيه فكره و ملاحظه حلوه فكرت اختصره او اخد منه مقتطفات لكن بجد خساره ان قطعه فيه ما تقريهاش .. تحياتي لصاحبه الموضوع و اترككم مع افكار للتغيير
*********
تعالوا شوفوا كيف بأتغيــر .. دعوة لكل من رغبت بالتغيير وفشلت .. لنستمر :)
بسم الله الرحمن الرحيمالسلام عليكم ورحمة الله وبركاتهكيفكم يا أحلى حوائيات صاحبات هالقسم الي أحس تفوح منه ريحة البخور والعطورات ويلق لق من النظافة
دائما ف القسم أتصفح وأتعلم أشياء جديدة مهارات وأفكار جديدة ..
أطبق أشياء كثير بس ف الاخير ما ارضى عن نفسي ..
و ما كنت عارفة من وين المشكلة ..
لحد ما قريت دورات لوحدة بمنتدى ثاني الله يسعدها ويوفقها وين ما راحت أحس جد فتحت عيوني ..
لقيتني انسانة بلا اولويات
ماشية ع البركة ..
والله يا بنات لما فكرت فيها لقيت أني جد جد مالي أهداف ولا طموحات أشوف الشي يعجبني وأشتريه ويطيح ف كبدي لاني ما ادري ليه شريته وماكنت ف حاجته

خصوصا ملابسي وملابس ولدي بالذاااااات اشوف شورت حلو آخذه أشوف جزمة حلوة الله يكرمكم آخذها وتصغر عليه وهو ما لبسها ليه !!!!
آخذ على عمآآآآي العالم تركب أشياء تنسق تعرف وش تشتري لا انا اروح عمياني لقيت شي عجبني خذيته حتى لو ما ادري كيف يستخدم ..
بيتي مهتمة فيه بس مو ذاك الاهتمام اميل للاهمال اكثر ..
ما افهم زوجي لانه انسان منظظظظم جدا وانا وحدة قمة ف االعشوائية ..
وهذا سبب الخلاف الدائم ..
وهو شخص ناقد درجة أولى ويدقق ع أتفه الأشياء وأصغر العيوب ..
يعني لما أهمل البيت شويات ويتكركب ويشوفه مايخلي كلمة مايقولها ..
بس اذا شافه على غيرالعادة بزود نظافة وترتيب مايعجبه !!!!!
ويعطي نظرات الشي الي ماعجبني وهالشي مأثر فيني مرررررة ..
أخبص كل شي ببعضه ..
عمري ماسويت الغدا بوقته دااااايم متأخر ..
وداااااااايم محتاسة وأفكر وأحاول أنظم بس ماش لا حياة لمن تنادي ..

قريت الدورة وبالذات أول درس ووقتها عرفت أنا وش ناقصني ..
ناقصني أهداف وأولويات وطموحات ..

تزوجت وأنا أدرس وحملت قبل التخرج بشي بسيط قلت مراح أتوظف لحد ما يكبر ولدي شوية كبر ومالي خلق أتوظف عاجبتني قعدة البيت الأهداف اختفت والطموحات طارت مع الهواء مابقى الا تلفزيون وأكل ونوم وبيت وولد وزوج ..

حياتي صارت مملة رتيبة وروتينية ..
أهملت نفسي كثييييييير سمنت سمرت بشرتي جافة رجولي اللي يشوفها يحلف انها رجل واحد طول وقته ف المزرعة خشنة وقاسية وباااااااهتة ..

آآآآآآآه بس يالإهمال .. أدري طولت عليكم ويمكن ماله دخل بالقسم بس لخصت الدورة في نقاط بأشاركها معكم ..
ويوميا بإّذن الله ان استطعت راح أقول لكم ايش سويت في يومي وما أبي منكم الا التشجيع والدعوات لي بالاستمرار ولكم بالمثل ..

بداية ..
أحدد 3 أشياء راح تحسن حياتي ؟؟

1- تنظيم وقتي والنوم ليلاً .
2- تخفيف الجلوس على التلفزيون والكمبيوتر.
3- الأهتمام بنظافتي ونظافة طفلي ونظافة منزلي ..

أحدد الأشياء الي تمنعني من تحقيق السابق ؟
1- الكسل والخمول وقلة العزيمة .
2- التلفزيون والكمبيوتر والجوال تاخذ أغلب وقتي .

وحطيت في بالي معلومة مهمة ألا وهي ..
(( إن كنت عاجزة عن تغيير شيء ما الحل أن أغير نفسي ))
والأهم من ذلك كله ..
التوازن
أوازن بين الوقت والضغط ..
فالعلاقة بينهم عكسية

إذا زاد الوقت قل الضغط .. يعني اذا عطيت نفسي وقت أشتغل فيه وبدأت من بدري قل الضغط وهذا الشي الي أنا ما أسويه ..
وإذا قل الوقت زاد الضغط وهذا الشي الي انا عايشته أأجل كل شي لآخر وقت وما أخلص من غرفة وحدة الا الحيل مهدود وهذا أكبر غلط ...
كنت دائما إذا جيت أنظف أقول يوووه من وين أبدأ
غرفة النوم يبيلها كذا والحمامات وغرفة المعيشة والمطبخ وغسيل الملابس ووووووو دخلت في دوامة ما أطلع منها

اضغطي هنا لمشاهدة الصورة بحجمها الأصلي

وهذا الي يخليني أأجل كل شي لآخر لحظة
فتعلمت أولوية التنظيف ..
1- المطبخ
2- دورات المياة
3- غرفة الممعيشة ..

يعني أبدأ فيهم أول ثم أبدأ بالأشياء الثانية وإن شاء الله راح أتتبع هالأولوية من اليوم ورايح
طيب أنا عرفت ان التوازن يعتمد ع الوقت والضغط .. السؤال الأهم ..
كيف أوازن حياتي ؟؟
أوازنها بالأولويات ..
والألويات فيه منها** ثااااابتة لا تتغير من حيث الأهمية والإلتزام ..
1- الصلاة والنوافل
2- قراءة ورد صباحي نصف ساعة
3-التربية (( تربية طفلي تربية إسلامية صحيحة متبعة فيها قدوتنا جميعا نبينا صلى الله عليه وسلم وأعرف أن ما جعله الله زينة لحياتي أطبقه فعلا بتربيتي و إهتمامي وعنايتي بإذن الله ))
4- طاعة الزوج
5- الإهتمام بصحتي (( وإن لنفسك عليك حقاً ))
6- قضاء وقت خاص بي ..

** ثم بعدها أبدأ أنظم وقتي على حسب هذه الأولويات ..
يعني أسوي لي جداول بس ما أسويها وأرميها بدولاب وأنساها !! لا أعلقها بمكان واضح أشوفه غالب اليوم وأكيد مافيه زي الثلاجة
** تفويض بعض الأعمال .. يعني ما أذبح نفسي وكل شي لازم أنا أسويه فإتخذت قرار بإني أحضر خدامة بالساعة أسبوعياً أكلفها بالآتي ( الكي وتطبيق بعض الملابس ان وجد + غسيل الحوش ) ومراح ياخذ منها الشي الكثير ومراح أخسر المال الكثير عليها ..
** تبسيط الحياة ..
وذلك بأنهاء الأفكار السوداء يعني أنا إنسانة بيتي مو عاجبني وأبي أغير فيه ودايما أرمي اللوم بإهمالي على ان البيت مو عاجبني ولو عاجبني اهتميت فيه وهذي حجة الضعفاء واعترف اني ضعيفة ..
غير كذا المقارنة أقارن نفسي بفلانة عندها غسالة صحون فلانة عندها غسالة أتوماتيك و و و و ..
أكيد فلانة هذي عندها أكبر من همي فـ هنا يأتي معنى (( من راقب الناس مات هماً ))
قررت أني أترك كل شخص بحاله وأركز على نفسي ونفسي بس لأني لو قارنت بأحبط نفسي وبس وما راح ترجع علي بأي فوائد ..

طيب قلنا راح نرتب أولوياتنا حسب الجداول ..
كيف ؟؟
أرتب قائمة أعمال أولاً .. ويكون وقتها ليلاً قبل النوم أو الصباح عند الاستيقاظ ..
كيف يكون الترتيب ..
حسب الأهمية ونراعي الأهمية ثم الأهمية فقط مو أشتهي أرتب ذيك الغرفة وأروح والأهم حوسة ..
وقلنا أولوية التنظيف سابقا وهي المطبخ ،، دورات المياة ،، غرفة المعيشة ..
أبدأ بتنظفيها وخلاص ثم نروح نتعمق بباقي البيت نشغل الغسالة ونرتب غرفة النوم مثلا ونرجع نطلع الملابس مثلا ونحط دفعة ثانية ووقتها نروح نرتب بالمطبخ ونحضر للغدا وهكذا ..

نحضر القوائم أسبوعية ويومية ..
أهم شروطها .. ماتكون طويلة لأننا راح نرهق أنفسنا ونزيد الضغطط عليها ..
وتكون متوازنة زي حركة ساعتين شغل مستمر بدون أي ملهيات نهائيااااااا يعني وقتي المؤقت على ساعتين
والاهم يكون مافيه تلفزيون أو أي ملهيات ما عدا تشغيل سور من القرآن والجوال وقتها يكون صاااامت ..
لأننا عارفين حركات أحد يكلمك واتس وتقومين تنخرطين بسوالف مالها داعي وتتركين بيتك
ماضيعنا الا الواتس والقروبات أشغلتنا .. وبعد الساعتين المستمرة عطي نفسك بريك نص ساعه طقطقي ع اي شي تحبينه واشربي لك كوب عصير أو وجبة خفيفة ونرجع للساعتين وهكذا ..

طيب شوفوا ترتيبي لجدولي الاسبوعي واليومي ..
الاسبوعي :
الاحد : دورات المياه + المطبخ
الاثنين : غرف النوم (( قناع للوجه ))
الثلاثاء : غرف المعيشة
الاربعاء: غرف الضيوف + غسل الملابس
الخميس : تنظيف سريع وشامل (( وهذا اليوم الي أجيب فيه الخدامة الي بالساعه تشوف لي الملابس تطبقها وتكويها وتغسل لي الحوش )) + (( خلطة للجسم ))
الجمعة : خاص بأهلي
السبت : رااااااااحة تامة + تجهيز للدوام يعني كل ملابس زوجك جاهزة من ثياب ملابس داخلية شرابات جزم ملمعة شماغات كل شي جاهز ومرتب ..

اليومي :
المطبخ + دورات المياه + غرفة المعيشة + الصلوات ..

ونحط في بالنا مافيه بيت مثالي ..
فاهميييييييييييين .. ما فيه بيت مثاااالي
كل بيت يمر بحالات كركبة ووصخ وقرف كلللللللل بيت
لا تجبرين نفسك على أشياء ما منها فايدة ومافيها الا ضغط زائد ومرهق ..
ما أقول اهملي البيت بس ابعدي عن الوسواس بالنظافة

كثير ناس يسعوم إلى الكمال والكامل الله ..
لكن هناك كمال بناء وكمال هدام ..

الكمال الهدام الي عايش فيه ناس كثير وتقول دائما انها مش راضية عن حياتها ومقصرة بواجبها ودائما النتائج ماتعجبها هذا شي يهدمك ويحطمك ..
الكمال البناء .. هو أبني شخصي وذاتي أعلمها النظام والكفاءة وأبعدها عن الإرهاق والضغط النفسي

طيب كيف أخفف من الضغط على نفسي ؟؟
أمشي على جدولك اجتهدي طول الاسبوع وراح تلاقين يومين راحة تامة وش أحلى من كذا ..
وغير كذا بتحصلين هاليومين بدون تأنيب ضمير لأن كل شي مرتب ونظيف وبمكانه

يا حلاة الراحة النفسية صح
طيب كيف أبدأ يومي ..
1- شور دافيء وسريع
2- ملابس مريحة وخفيفة (( إذا ماعندك أطفال أو لسه صغار ومايفهمون سنة وأصغر ما فيه أحلى من الشورتات القطنية ))
3- فطور مدلل ما أقول لك سوي أومليت وحركات فنادق لا خلي صحونك حلوة أكوابك تقديمك للفطور لو أنه خيار ولبنة بس رتبيه بطريقة تفتح نفسك
4- أراجع القائمة إذا أبي أحذف شي ممو مهم أو سبق وسويته كشغل إضافي أو أأجله لليوم الي بعده وأنتبه ما يتأجل أكثر من يوم ويكون التأجيل لسبب مقنع زي زيارة أو موعد أو عزيمة ..
5- أبتكر قوانين خاصة فيني زي نظام عمل راحة زي الساعتين الشغل والنصف راحة .
كل وحدة تحط قوانين تناسبها
6- الشكر .. أعود نفسي قبل الخلود للنوم أشكر ربي على 3 نعم (( ولئن شكرتم لأزيدنكم ))
7- نعدم الروتين ..
كيف ؟؟
مثلا أمس بديت بتنظيف المطبخ اليوم أبدا بدورات المياه
اليوم بخرت البيت ببخور الفلاني ورشيت معطر ججو بكرا أبخر ببخور آخر وأشغل فواحة
والأفكار كثييييييييييرة

بعدها نجي لــ
القائمة الرباعية لتحديد المهمات

1- عاجل مهم أو المسمى بـ (( الطوارىء ))

هذا الوضع أو هذي المهمة تتحكم فينا لأننا لازم نخلص الشغلة بوقتها وما تتأجل نهائيا زي ضيوف جايين بالطريق ولازم قهوة وتبخير للبيت والتأكيد على نظافة غرفة الضيوف وتجهيز وو و..
وومكن تكون وضعيتنا وضعية الطوارىء اذا أأخرنا الحاجة وخلاص مالها مجال تتأخر أكثر فندخل في وضع الطوارىء ونجلس نركض هنا وهناك وحالتنا حالة ..

كيف نتجنبها .. بــ رقم 2
2- مهم غير عاجل أو (( الجودة ))

عكس الطوارىء تماما الطوارىء كانت تتحكم فينا بس الجودة احنا الي نتحكم فيها بتنظيم وقتنا اقوم انظف بجودة وترتيب وبراحة تامة مو أركض وأخلي كل شي لآخر لحظة ويصير ترتيبي أي كلام ..
وبيكون بيتي مرتب طول الوقت ونظيف وهذا ما يضطرني أدخل بحالة الطوارىء والأهم من ذلك كله ما أأجل مرحلة الجودة لأنها مع الوقت بتصير حالة طوارىء
الجودة حالة تشعرنا بالسعادة والرضا عن النفس دائما نتخلص من تأنيب الضمير والاحساس بالذنب والتقصير وبيتي دائما نظيف لي ولعائلتي وحتى لضيوفي ..
اضغطي هنا لمشاهدة الصورة بحجمها الأصلي

3-عاجل وغير مهم والمسمى بـ (( الخداع )) ..
الي هي أعمل أشياء مالها داعي أبدا وأنا قادرة أعملها في وقت ثاني وبالراحة التامة وغاليا يكون حاجة مالها أي أهمية في تنظيم بيتي وحياتي .. الصورة توووضح كل شي ..


وش حادها تكوي وتكلم وترضع وتراقب الساعة لأنها تأخرت
بالتنظيم الجميل أحس على الراحة والجودة معا ..
4- غير عاجل وغير مهم (( الضيــــــــــــــاع ))

وهي حالة الادمان الي الغالب يمر فيها
أأجل شغل البيت عشان مسلسل أو مكالمة أو محادثة وأنسى حياتي أتخبط هنا وهناك وأطالع أشوف أنا ما أنجزت شي هذا هو بحد ذاته الضياااع .. لأني أهتم بحاجة لا قيمة لها ..
ونعملها طول الوقت ..

طيب أنا قستها على نفسي وحددت مهمامي شوفو وش طلع معاي :
1- أمور هامة وعاجلة : أولوية التنظيف
2- هامة غير عاجلة : باقي الأسبوع الي هو جدولي الأسبوعي كل شي يكون بوقته ليش أعجل فيه
3- غير هامة عاجلة : جوالي والواتس وكل برامج الملهيات
4- غير هامة وغير عاجلة : التلفزيون والنت واللاب ياااااااااااااه ياخذ أغلب وقتي على غير سنع غالبا ..

كل وحدة مرت بحالتي أو تشابهها أكيد انها مضيعة شي ومو لاقيته شي مانقدر نعيش بدونه وهو الي مأثر على حياتنا سلباً دائما نفتقده ونبحث عنه بس بدون جدوى ..
تدرون ايش ؟؟

الـــــــــســــــــــــعـــــ ــــــــــــــــــــادة
**معوقات السعادة :
1- نبحث في المكان الخاطىء .
ايش يعني هالكلام ؟؟؟ يعني نعلق السعادة بحاجة معينة وانو ما راح نصير سعيدين الااذا توفر هذا الشي زيي انا لما أقول لان بيتي مش عاجبني لو أغير اثاث البيت بأصير أحب التنظيف ..
أنا لما أتخذ قرار السعادة ابحث عنه في داخلي جواة روحي يعني شي معنوي وليس مادي ..
حطي هالمقولة في بالك ..
الإنسان روح وجسد وسعادتي ترتبط بروحي وليس جسدي
2- الإستعانة بالصبر والصلاة والدعاء ..

السعادة لها نوعان .. الوهمية والحقيقية ..
مالفرق ؟؟
السعادة الوهمية : هي التي تتعلق بالأشياء الخارجية .. وهي ليست سعادة حقيقة لأنها تنتهي يعني أثاث جديد بكرا يخرب شغالة بكرا تروح غسالة بكرا تنعدم وهكذا ..
السعادة الحقيقية : هي التي تتعلق بالأشياء الداخلية وهذه السعادة الداخلية تعود علي بالسعادة الخارجية .. مثل لما أصحى من النوم وأفتح شبابيك البيت حاجة تشعرك بالسعادة ونور الشمس يدخل جوا بيتك وتجديد الهواء والطبيعة هذي كلها أشياء دائمة ما دامت أرواحنا وهذه السعادة الحقيقية لأنها لا تنتهي ولا تختفي
3- إيقاف التفكير السلبي :
قال تعالى : (( لقد خلقنا الإنسان في كبد ))
كل شخص يسعى ويبحث ويتعب ومهموم كل شخص على وجه الأرض وليس أنا .. وهذا الأمر مع الوقت يصبح عادة تسيطر على حياتي وتنسيني أمر السعادة
كيف أتخلص من التفكير السلبي ؟
1-التركيز على الإيجابيات .
2- تطوير قدرتي على التفاؤل .
3- الثناء على النفس

والله ان الثناءء على النفس له وقع عظيييييييييييييم على روحك يمدك بالراحة والسعادة وتعزيز الثقة بالنفس فلماذا انتظر الناس تثني علي وانسى اهم شخص الا وهو نفسي
5- إلقاء اللوم على الآخرين
]
إلقاء اللوم هو حجة حجج الضعفاء لأنه ما يبي يعترف بخطأه فهو ضعيف
لا عيب أن أكون على خطأ ولا عيب أن أحاول أن أصلح من نفسي .. ويجب إيقاف إلقاء اللوم على الناس ..
كيف ؟؟
1- التركيز على الموقف
2- إيجاد الحلول
3-نفكر في الأشياء التي تسعدنا ..

نعم فكري في الأشياء التي تسعدك بدل الاحباط الي يرافقك طول اليوم ..
كيف أعرف ما يسعدني ؟؟
1- أفكر في هواياتي
2- أنفذها
3- أخصص لها وقتي مثل (( ساعتين يوميا ))
4- نحصر المهارات

يعني انا ايش ماهرة فيه ..
حطي لك مهاراتك وعطيها درجة من 1 إلى 10 وإبدأي بتطويرها كأن تخصصين يوم ف الاسبوع لكل مهارة ..
مثلا في الايام الي تكون راحة ومافيه شغل ..
طيب نشوف قائمة مهاراتي ..

مهاراتي وهواياتي
1- الطبخ (7/10 )
2- الرسم (5/10)
3-القراءة (10/10)
4- الكتابة (9/10)
5- المكياج (7/10 )
6 - التنظيم (8/10 ) انا انسانة اححححححب التنظيم لكن لا اجد له وقت كالغالب مثلي ..
7- التصليح (6/10)
المهارة الاخيرة يالله كيف كان استغلالي لها وانا بنت لسى اي شي يخرب أصلحه مكنسة غسالة تلفزيون اكسسوار ادراج اييييييييي شي يخطر ببالكم والحمدلله ربي عطاني هالموهبة ليش ما أستغلها وأضبط بيتي لأني لو بأعتمد على ابو الشباب جلست سنة

ونبدأ نخصص لكل حاجة وقت ونطور هالمهارة ..
يعني مانسيت ربي ولا بيتي ولا نفسي ولا طفلي ولا زوجي ولا اهتماماتي وهواياتي ولقيت وقت للجميع ليش أرجع لحياة الروتين الممل والرتيب ..
قطعت وعد على نفسي أن أبدأ من اليوم بالتغيير أضيف لمسات .. أنظف المتسخ .. أصلح القديم .. أرمي المتهالك والبالي .. أتصدق بالفائض .. وأحب ربي أكثر وأكثر وأكثر ..
وإن شاء الله مع كل انجاز راح انزل تقرير مصور في هذا الموضوع ولا أريد سوا الدعاء والتحفيز منكم ولكم بالمثل وكلنا نعرف ان هالمواضيع تحمس على العمل والنشاط وتحفز الهمة ..
أتمنى عجبكم موضوعي مع انه طويل مرة ..
وأتمنى استفدتوا ..

سُبْحَانَكَ اللَّهُمَّ وَبِحَمْدِكَ أَشْهَدُ أَنْ لا إِلهَ إِلأَ انْتَ أَسْتَغْفِرُكَ وَأَتْوبُ إِلَيْكَ
رابط الموضوع الاصلي http://m.forum.hawaaworld.com/showthread.php?t=4036025

0 التعليقات :

إرسال تعليق

Related Posts Plugin for WordPress, Blogger...