الصفحات

بحث

ادخلي ايميلك ليصلك كل جديد

الاثنين، 17 فبراير 2014

اتيكيت و فن التعامل علي الفيس بوك

بتستخدم الفيس بوك كتيير؟؟

طيب تعرف إن الفيس بوك كمان له اخلاق فى التعامل؟؟؟

 اه والله اقولك زى إيه..

مثلا لو.حد كاتب كلام إنت مش فاهمه إستاتيوس غامضة بلاش تدخل وتكتب هو إنتى قصدك مين ولا يعنى ايه الكلام ده؟؟؟
طالما مفهمتش إعرف إنها رسالة لمن يهمه الأمر فبلاش فزلكة..

بلاش تنزل صور ليك فيها ناس تانية وتعمله تاج من غير ماتاخد إذنه ..اه إفرض مش حابب حد يتفرج عليه..مش عشان حضرتك فى الصورة يبقى سبيل كل الناس تتفرج عليه معاك !!!
ركز قبل ماتدوس بوست…

لو حد.كاتب حاجة مضحكة ومستنى الناس تضحك على كلامه هو …ماتجيش إنت تخطف نظر الناس بكومنت اكثر سخرية من البوست نفسه ومن تعليقه !!
الكومنت فن على فكرة.واخلاق…

لو حد كاتب كلام حزين…متدخلش تقوله كلنا كده وانا كذا وكذا وتحكى تاريخ مآساتك …مش وقتك على فكرة !!
بلاش القفز على احزان الآخرين ده هو بيكون محتاج كلمة تطبطب عليه مش واحد يتفزلك بقوة تحمله!!!!

بالنسبة لتهانى عيد الميلاد من الأدب ترد على كل تهنئة…طب ماهما كتييير اوى!!! يبقى على الاقل تكتب على الوول عندك شكر لكل الناس ومتردش بقى على كله مش ناس وناس …
اه مش بيكون منتظر تشكره بس ده اخلاقك إنت فى الاول وفى الاخر…

ماتكتبش حاجة خاصة لحد فى كومنت من باب إنكم إتقابلتم صدفة فى بوست..مثلا زى ..وفلان زعلانة منك وحاول تكلمها!!! إيه ده!! إستخسار مكالمة مثلا ولا إستسهال توصيل الرسالة!!! متخليش الفيس بوك وسيلة لكل رسايلك الخاصة على الملاء….

واحد حاطط صورة إبنه او بنته…متجيش تنزل صورة إبنك الأجمل منه فى كومنت!!! إنت مش فى مسابقة كل إبن عند اهله اجمل مايكون..وماتكتبش كلام بايخ زى هو عامل كده ليه؟؟؟ ولا شبه كذا من باب قال يعنى كوميدى حتى لو اللى حاطط الصورة اخوك اختك وعادى بينكم.. عييب تحرجه فى العلن كده مش ظرف يعنى!!!..

لو لقيت بوست عائلى وكل الكومنتات عائلية حتى الصورة عائلية…خلاص هتدخل تكتب تعمل إيه؟؟..ايووة عارفة إنه عام …بس خلاص طالما ضم العيلة يعنى إكتفى باللايك وخلاص مش لازم تدخل فى النص تكتب ميييين دول اللى متصور معاهم ؟؟؟سؤال فى غير محله!!!..

من باب الذوق حد كاتب فكر معين او.رأيه إنت مختلف معاه..خلاص ماتعلقش بنقاش حاد ولا تبينله إنه غلطان وتنتهى الكومنتات ببلوك!!!!! طب ما إنت عارف نهايتها ايه بقى لازمة النصيحة اللى قدام الكل دى وحرب مين هياخد لايكات اكتر على رأيه؟؟ هو بيكتب فى بروفايله الخاص متبقاش متطفل وتدخل تنتقد بكل قلة ذوق وعجرفة!!! إعمل نفسك ماقرتش حاجة او لو عايز تنصحه بينك وبينه مش من الأدب إجباره على رأيك!!!…

حد لسة داخل جديد على الفيس وخصوصا فى كبار دلوقتى بقوا يعملو حساب لهم من باب مشاركة اولادهم واحفادهم الإهتمامات…متجيش فى كل حاجة يعملها تقوله ..ايووووووةة. وعرفت الفيس بوك بقى وبقيت خبير!!! يعنى حضرتك اصلا اول مادخلت الفيس بوك.كنت فاكر الشير ديليت فبلاش نبين إنه مستحدث…مش املة إنك بروفيشنال يعنى!!!!….

ماتحطش بوست عتاب او لوم وتكتب فوق إسم حد معين قال يعنى الرسالة وصلت…حتى الإسم على فكرة له إحترامه..هو.هيعرف لوحده من غير الفضايح دى..خليك ذكى فى توصيل الرسالة..مش ممكن تخبط عصفورين بحجر واحد:)))…

فى حاجات تانية اكييييد يمكن مش إفتكرتها ..بس معنى إن الفيس بوك تواصل إجتماعى يبقى حريتك تقف عند البدء فى سلب حرية الآخرين..حتى التواصل العام له قواعد واخلاق ومبادىء..إتعلم مبدأ فن التواصل حتى لو بشكل معاصر..المبادىء مبتتجزئش….ولاإيه رأيكم؟؟

من4nono

0 التعليقات :

إرسال تعليق

Related Posts Plugin for WordPress, Blogger...