الصفحات

بحث

ادخلي ايميلك ليصلك كل جديد

الأحد، 9 فبراير، 2014

بعض الافكار المجمعه للتوفير من بيتي مملكتي

بعض الافكار المجمعه للتوفير مش لازم كلهم تنفذيهم .. اختاري النقطه المناسبه ليكي  و استخدميها ..
  • اي مخزون للمنزل غير الطعام زي الشامبوهات .. الفوط الصحيه .. المساحيق .. الصابون .. اي عنصر صلاحيته مفتوحه اشتريه بالجمله من اماكن بيع الجمله و كميه تكفيكي فتره ممتده كل شهر اختاري ماده من المواد دي او اتنين حسب ميزانيتك و جيبيها بالجمله مش لازم كله في وقت واحد علشان حيكون مكلف جدااا و صلاحيه المواد دي غالبا من سنتين لتلاته علي المدي الطويل حتوفر مبلغ كويس
  • عند تقسيم مصروف البيت شيلي المصاريف الاساسيه في ظرف ( الايجار .. فلوس الميه و النور و النت .. لو في دروس للاولاد .. مصاريف الاولاد
    قسمي باقي المصروف علي اربع اظرف لكل اسبوع ظرف حاولي علي قد ما تقدري تحكمي نمفسك في مصروف الاسبوع اللي معاكي و ما تتعديش للظرف اللي بعده و حاولي كمان تحوشي و لو حوشتي و لو عشره جنيه شيليها في ظرف خامس يكون للتوفير و موجود وقت الحاجه ما تضيفيهوش علي مصروف الاسبوع اللي بعده
  • بمصروف الاسبوع انزلي جيبي طلبات البيت و خللي في محفظتك المبلغ اللي مخصصاه للتسوق و خللي في جيب تاني في المحفظه زياده 100 جنيه مثلا ما تدخليش فيها الا للطوارئ و اقلمي نفسك انها مش موجوده
    علي فكره انا قبل ما باحاسب في سبينس او اي ماركت بابص بصه سريعه في العربيه ان كل حاجه انا محتاجاها فعلا ممكن جداا اراجع نفسي في حاجه و ارجعها مكانها جربي الفكره دي حتفرق معاكي
  • خللي عندك نوته في المطبخ و قلم لو حسيتي ان في حاجه قربت تخلص اكتبيها علشان تجيبيها في تسوقك بسعر معقول او عرض كويس ما تتزنقيش فيها بعد كده
  • الاطعمه اشتريها بالاسبوع افضل منها التلاجه بتكون مش متكدسه و بتستهلكي احتياجك فعلا لان كتر الحاجه بيعلم الاسراف كمان الفاكهه و الخضار و الجبن بيكون قدامك وقت تستهلكيهم قبل ما يفسدوا من طول التخزين
  • روحي السوق و الماركت و هو مش زحمه علشان تقدري تقارني الاسعار و تعرفي العروض كويس .. كمان اقل كميه ما تتكسفيش انك تشتريها ممكن تاخدي اللانشوه او اللحمه البارده مثلا بعدد الشرايح و الخضار بالواحده و تتوزن عادي و علي فكره هما بره بيعملوا كده ده دليل علي الوعي مش قله الاموال
  • و انتي بتشتري احتياجاتك اعملي حسابك حتاكلي ايه يعني يومين لحوم مثلا يومين سمك يوم دجاج يوم بقوليات كده يعني و اختاري الكميات اللي حتتقسم صح وزنا و كميه علي الايام دي
يا رب يكون فادكم الموضوع :)

1 التعليقات :

افكار حلوة انا معجبة جدا بك شكرا

إرسال تعليق

Related Posts Plugin for WordPress, Blogger...