الصفحات

بحث

ادخلي ايميلك ليصلك كل جديد

الاثنين، 17 مارس، 2014

عن موضه التوحد وصيحة الهيبر اكتيف اتحدث

عن موضه التوحد وصيحة الهيبر اكتيف اتحدث

الي الامهات العزيزات لتعلمي سيدتي ان كل طفل غير الاخر حتي التوائم تختلف

لذا قبل ذهابك الي طبيب بطفل عمرة العامين اسالي نفسك الاسئله الاتية :

* بتلعبي مع طفلك كام 
ساعه في اليوم ؟
* بتخرجي طفلك كام ساعه في اليوم في مكان مفتوح يسمح له بالجري ؟
*هل يتعامل طفلك مع اطفال اخرين في نفس عمره ؟
* مامعدل زياراتك العائلية انت ووالده ؟
* كم مره تشاجرتي انت وووالده امامه؟
*كم ساعه يجلس طفلك امام التلفااااااااااز ؟
*هل يعاني طفلك من التهابات مزمنه في الاذن او لحمية بالانف ؟
*هل تقرئين لطفلك اوتغنين له اغاني معينه قبل النوم ؟

باختصار قبل ما تروحي لاي طبيب بدعوى تاخر الكلام ويشخص ابنك انه عنده طيف توحد او تشتكي من عنفه فيشخصه فرط في النشاط

اجيبي عن الاسئله بامانه
هتلاقي الاتي انك ما تلعبيش معاه .. ما بيخرجش محبوس
ما بيشوفش حد تقريبا غير حضرتك
ما بيجريش حوارات ماعنودش قصه عارف انها بتاعته بيجبها لك قبل النوم تقرئيها له
ساكنه بعيد عن اهلك واهل زوجك وما بتخرجيش الولد اي زيارات عائلية ولا حتي عند الجيران , مافيش اي تفاعل مع المجتمع

كل اللي بتعمليه حضرتك تصحي الصبح تاكليه الافطار وتفتحي التلفزيون وتشغلي طيور الجنه او كراميش او سبيس تون … الخ وتسيبيه قدامها بالساعات
وبعد ده كله تشتكي انه ما بيتكلمش
انه عنيف
انه ماعندوش قدره علي التواصل مع الغير

وتيجي صديقة لك قرات لها كلميتن في مجله من اياهم تشخص حاله ابنك وتنكد عليك وتدفعك انك تروحي لطبيب

اول ما تروحي البيه من اول نظره لانه شاطر يشخص الطفل ويديه حاجتين ادوية لعلاج فرط الحركه او ادوية اكتئاب
ويطلب منك جلسات تخاطب في احد المراكز بتاعه الدكتور

وبكدا الف مبروك بقي عندك طفل مريض ومحتاج علاج خاص ومدرسة خاصه غير انه هيعاني من الاعراض الجانبية للادوية ..

علي فكرة تخيلي نفسك مكان ابنك محبوسة في البيت بتتفرجي علي التلفزيون طول اليوم باستمرار ما بتشوفيش غير وش واحد بياكلك ومابيكلمكيش
تخيلي كدا انت هيحصلك ايه

يا حضرة الام انت حابسه ابنك حبس انفرادي زي اللي في السجن بالظبط ومش عاوزاه يتعب ويعتبك معاه !!!!

لذا رجاءا

1- اقفلي الهباب اللي اسمه التلفزيون

2- يوميا في خروج للطفل ساعتين علي الاقل ويفضل الصبح او بعد العصر علشان فيتامين د

3-علي طول بتتكلمي معاه شايف الشجرة شايف العربية تعالي ناكل امسك الكوب ولو مش بيرد عليكي فهو بيخزن

4-للمتاخرين في الكلام الي 3 سنوات لو عند ابنك لحمية اعمليها لو عنده مشاكل في افرازات الاذان الوسطي عالجيها قبل وصوله لسن الرابعه وان شاء الله يتكلم ولا مذيع النشرة

5- للاطفال الانطوائيين اصنعوا مجتمع لهم في البداية وبالتدريج هيستجيبوا

6- للاطفال النشطين .. طول اليوم لازم يلعبوا لازم يخرجوا كثييييير و الاهم تشتري لهم كتب والوان والعاب تدفعهم للهدوء قليلا

7- اكرر معلش انا طبيبة و لا اقصد اهانه الاطباء .. لكن تشخيص فرط الحركة وقله التركيز بيكون في حدود الخامسه وبمتابعه لمده اسبوعين
يعني مش من اول نظره بيتشخص ومش في عمر الثالثه ابدا
وتشخيص التوحد مش بمجرد النظر ولو تشخصيه ماينفعش يكون علي العوام كدا

8-في نظام كدا طالع في المدارس الهاي اسمه مونتيسوري وده للعلم اول ماطبق طبقته الطبيبة مونتيسوري مع الاطفال المعاقين ذهنيا وكانت النتائج مبهره
حاليا نحن نطبقه في المدارس ام الافات مع الاطفال الطبيعين مش هيجري حاجة لو حضرتك قراتي فيه وشوفتي ازاي ممكن تتعاملي مع طفلك

9- تذكري كل انسان مميز عن الاخر وخلق لوظيفه مميزة
اسالي جدتك عن اخوالك واعمامك هتقولك كان فيهم الشقي فيهم الزنان فيهم اللي بيضرب فيهم اللي بيخرب فيهم اللي تاخر في الكلام …. الخ
كلها اشياء تخلصوا منها بالتربية مش بالادوية

للعلم د.مونتيسوري اعتبرت ان اغلب اسباب الاعاقه العقليه يرجع الي البيئة

لو سمحتي المرض العقلي يا جينات وده الادوية مش هتعالجة لكن هتعالج اعراضه يا سلوكي وده البيئة وتغيير التعامل هيغير منه

يعني فكرة الادوية والعلاج اياه مش هي الاساس

الجئي الاول لتهذيب سلوك الطفل
اخلقي له بيئة طبيبعة
ابذلي معاه مجهود مضاعف
توقعي انه مميز
بطلي تقارني بينه وبين اقرانه لان لكل طفل خواصه

احبي طفلك حب معايشة وليس حب تملك
احنا ما بنخلفش العيال علشان نتفاخر بيهم ويبقي اسمنا امهات واباء
احنا بنخلفهم علشان نعيش معاهم ومافيش طفل بيتربي ذاتيا من نفسه بينزل من بطن امه يربي روحه ويعلمها وياكلها علشان حضرتك ترميه طول اليوم قدام التلفزيون ومتوقعه يبققي طفل سوي

ومعلش زمنا صعب مافيش بيوت مفتوحه علي بعض خلان واعمام
ولا مساحات خضرا ولا ملاهي تضعي طفلك فيها والحضانات غالية جداا وفوق مستوي المتوسط بكثير

معلش زمنا صعب والاحمال كبيرة لكن انت ام مش مكنه انجاب
ام يعني بتربي وبتعلم مش مجرد بتفقس عيال وتشتريلهم لبس واكل

10-اخيرا شيء قلته واكرره اعتبري ان ابنك مريض وحاولي تغيري سلوكه بتغيري محيطه قبل ما تلجئي للادوية وماتسمحيش للفتايين بالفتوى والاطباء باستغلالك ماديا
غيري محيط طفلك لمده 6 اشهر وعالجي اذنه لو متأخر بالكلام لو لم يستجب روحي لطبيب ثقه ولو شخص ابنك من اول نظره وكتب روشته سيبيه لانه بيعك

ملحوظه : المقال منقول و مش عارفه مصدره الاساسي فين لكن حسيت اننا لازم نقراه .. لو تعرفي المصدر يا ريت تبعتيلنا الرابط

0 التعليقات :

إرسال تعليق

Related Posts Plugin for WordPress, Blogger...